Friday, February 15, 2019

လောကလူသားအားလုံအတွက် ပွင့်ပေါ်လာသောတမန်တော်


တမန်တော်မြတ်မိုဟမ္မဒ်(ဆွ)မှတပါး ရှေးအထက်က တမန်တော်များမှာ သူတို့နှင့်သက်ဆိုင်ရာ လူမျိုးစု၊ ဒေသတစ်ခုအတွက်သာ ဖြစ်ပေသည်။ အလ္လာဟ်အရှင်မြတ်သည် အာဒမ်(အ)မှစ၍ ခေတ်အဆက်ဆက် ကမ္ဘာ့လူသားမျိုးနွယ်အသီးသီးထံသို့ သတိပေးနှိုးဆော်သူ တမန်တော်များစေလွှတ်တော်မူပြီး လူသားတို့အားလမ်းညွှန်တော်မူခဲ့၏။ဤသည်ကိုပင် ကျမ်းတော်မြတ်ကုန်အာန်၌-
'ဝလေကွလ်လေ ကောင်းမင်န် ဟားဒင်န်'
လူမျိုးတိုင်းအတွက် သတိပေးနှိုးဆော်သူ တမန်တော်တစ်ပါးစီရှိ၏ ဟူ၍အရှင်မြတ်က မိန့်ဆိုထားပေသည်။

ထိုရှေးအဆက်ဆက်ကပွင့်ပေါ်ခဲ့သော နဗီတမန်တော်တို့မှာ သူတို့နှင့်ဆိုင်ရာမျိုးနွယ်၊ ဒေသတစ်ခုအတွက် သာလျှင်ပွင့်ပေါ်လာခဲ့ရခြင်းဖြစ်ပြီး ကမ္ဘာလောကတစ်ခုလုံးရှိ လူသားအားလုံးအတွက် ပွင့်ပေါ်လာခဲ့ကြခြင်းမဟုတ်ချေ။ အလ္လာဟ်
အရှင်မြတ်သည် ထိုကဲ့သို့နဗီတမန်တော်များ အဆက်ဆက်စေလွှတ်ခဲ့ပြီး နောက်ဆုံးတွင်ကမ္ဘာ့လူသား အားလုံးကို လမ်းညွှန်ရန်အလို့ငှါ မဟာလူသားတမန်တော် မိုဟမ္မဒ်မွတ်စ်တဖာ (ဆွ)ကို စကြာဝဠာအပေါင်းအတွက် ကရုဏာတော်အဖြစ်စေလွှတ်တော်မူခဲ့ပေသည်။ တမန်တော်မြတ်ကြီး(ဆွ)အား အရှင်မြတ်ကကြငြောစေသည်မှာ-
'ကွလ် ယာအိုင်ယုဟန်နားစ် အင်နီရစူလွလ္လာဟေ အေလိုင်းကွန်မ်ဂျမီးအာ'
ပြောလော့၊ အို- လူသားအပေါင်း ကျွနု်ပ်သည် အသင်တို့အားလုံးအတွက်တမန်တော်အဖြစ် စေလွှတ်ခြင်းခံရ၏။ ( ရး ၁၅၉ )
ထို့ကြောင့် ကိုယ်တော်သည်ကမ္ဘာ့လူသားအားလုံး ကယ်တင်လွတ်မြောက်ရေးအတွက်လမ်းညွှန်တော်အဖြစ် ပွင့်ပေါ်လာခဲ့ပေသည်။
'ဝမာအရ် ဆလ်နားက အိလ္လာရာဟ်မသလ်လိလ်အာလမီန်'
ငါသည် အသင်တမန်တော်အား စကြာဝဠာကမ္ဘာလောကအပေါင်းအတွက်
ကရုဏာတော်အဖြစ် စေလွှတ်တော်မူ၏။( ၂၁း ၁ဝ၈ )

ထို့နောက် သမ္မာကျမ်း၌သခင်ယေရှု(ငြိမ်းချမ်းခြင်းသက်ရောက်ပါစေ) က မိမိနောက်တွင် ပွင့်ပေါ်လာမည့် တမန်တော်နှင့်စပ်လျဉ်း၍မိန့်ဆိုသည်မှာ-
'သင်တို့အား ငါပြောစရာစကားအများရှိသော်လည်း သင့်တို့သည် ယခုမခံနိုင်ကြ။ သမ္မာတရားနှင့်ပြည့်စုံသော ထိုဝိညာဉ်တော်ရောက်လာသောအခါ၊ သမ္မာတရားကို သင်တို့အား အကြွင်းမဲ့သွန်သင်ပြသလိမ့်မည်။' (ရှင်ယောဟန် ၁၆း ၁၃)
ထို့အပြင်-
'ယခုမှစ၍ငါသည် သင်တို့နှင့်များစွာမပြောရ။ အကြောင်းမူ ဤလောက
ကိုအစိုးရသော မင်းသည်လာဆဲဖြစ်၏။' (ရှင်ယောဟန် ၁၄း ၃ဝ)
ဓမ္မဟောင်းကျမ်း၌ တမန်တော်မောရှေအား ထာဝရဘုရားသခင်ကမိန့်ဆိုသည်မှာ-
'သူတို့အမျိုးသားတို့အထဲ၌ သင်နှင့်တူသော ပရောဖက်တပါးကို သူတို့အဖို့ငါပေါ်ထွန်းစေ၏။' (တရားဟောရာကျမ်း ၁၈း ၁၈)

ထို့ကြောင့် စကြာဝဠာကမ္ဘာလောကတစ်ခုလုံးဆိုင်ရာ တမန်တော်မြတ်ကြီးကိုစေ လွှတ်ပြီးသည့်နောက်တွင် လူသားအားလုံးအဖို့ အရှင်မြတ်နှင့်နီးစပ်ရန် လမ်းကြောင်းမှာ လည်းတစ်ခုတည်းသာလျှင် ရှိပေတော့သည်။ ယင်းမှာ-
'ကွလ်အင်န်ကွန်သွန်မ် သုဟိဘ်ဘူးနလ္လာဟာ ဖသ်သဘေအူးနီ၊ ယိုဟ်ဘိဘ်ကုမွလ္လာဟ်' ( ၃း ၃၂ )

'ပြောလော့၊ အကယ်၍အသင်တို့သည် အလ္လာဟ်၏ ချစ်ခြင်းကိုခံယူလိုကြပါလျှင် ကျွန်ုပ်၏ နောက်သို့ထပ်ကြပ်မကွာလိုက်ကြလော့။သို့ဖြင့်အရှင်မြတ်အသင်တို့အား ချစ်မြတ်နိုးလာပေလိမ့်မည်။' ထို့ကြောင့် လူသားဖန်ဆင်းခံရခြင်း၏ ရည်ရွယ်ချက်ကို ပေါက်မြောက်ရန်၊ဘဝရှင်နှင့် ချစ်ခင်ပေါင်းစည်းရန်နည်းလမ်းမှာ တမန်တော်မြတ် မိုဟမ္မဒ်(ဆွ)၏နောက်သို့လိုက်ရန်သာရှိပေတော့သည်။

Tuesday, September 4, 2018

သာသနာတည်ထောင်သူ အရှင်သူမြတ်များနေ့ အခမ်းအနား မန္တလေးတွင်ကျင်းပ

မြန်မာနိုင်ငံအတွင်း နေထိုင်ကြပြီး ကိုးကွယ်ယုံကြည်ရာဘာသာတရားများအကြား ချစ်ကြည်ရင်းနှီးမှု ပိုမိုတိုးပွားစေရန် ရည်ရွယ်ကာ သာသနာတည်ထောင်သူ အရှင်သူမြတ်များနေ့ အခမ်းအနားကို စက်တင်ဘာလ ၂ ရက်နေ့က မန္တလေးမြို့ရှိ မြန်မာနိုင်ငံဆရာဝန်များ အသင်းခန်းမတွင် ကျင်းပခဲ့သည်။

“ဘာသာတရားရဲ့ အနှစ်သာရ၊ ဘာသာတရားရဲ့ တန်ဖိုးတွေကို ဘာသာဝင်နောက်လိုက်တွေက တန်ဖိုးထား နားလည်တတ်ဖို့နဲ့ မိမိတို့ဘာသာတရားရဲ့ သွန်သင်ချက် အနှစ်သာရတွေကို သိမြင်နားလည်ဖို့၊ ဘာသာတရားအပေါ်မှာ ယုံကြည်သက်ဝင်မှု ပိုမိုပြီးတော့ တိုးပွားလာစေဖို့နဲ့ သာသနာဝင် အချင်းချင်းတွေရဲ့ကြားမှာ ချစ်ခင်ရင်းနှီးမှု၊ မေတ္တာထားတတ်မှု၊ အပြန်အလှန် စာနာနားလည်တတ်မှု တိုးပွားလာစေဖို့ ပြုလုပ်ရခြင်းဖြစ်ပါတယ်”ဟု မြန်မာနိုင်ငံ အဟ်မဒီယာ မွတ်စလင်အဖွဲ့ချုပ်မှ သာသနာပြုဆရာ ဦးဇေယျာမိုးက ပြောကြားသည်။

သာသနာတည်ထောင်သူ အရှင်သူမြတ်များနေ့ အခမ်းအနားကို ၂၀၁၇ ခုနှစ်ကစ၍ ရန်ကုန်တိုင်းတွင် ပထမဆုံးအကြိမ် ကျင်းပခဲ့ပြီး ၂၀၁၈ ခုနှစ် ဧပြီလကလည်း ရန်ကုန်တိုင်းတွင်ပင် ထပ်မံကျင်းပခဲ့ကြောင်း၊ ယခုတတိယအကြိမ်တွင် မန္တလေးမြို့တော်၌ ကျင်းပခြင်းဖြစ်ကြောင်း၊ အခမ်းအနားသို့ ဗုဒ္ဓဘာသာ၊ ခရစ်ယာန်ဘာသာ၊ အစ္စလာမ်ဘာသာ၊ ဟိန္ဒူဘာသာများမှ ခေါင်းဆောင်များ တက်ရောက်ခဲ့ပြီး သက်ဆိုင်ရာဘာသာအလိုက် တရားတော်များကို ဟောကြားခဲ့သည်။ “ကျွန်တော်က ဝန်ကြီးကိုယ်စား တက်ရောက်ခဲ့ပါတယ်။ ဝန်ကြီးသူရ ဦးအောင်ကိုပေးအပ်တဲ့ သဝဏ်လွှာလည်း ဖတ်ကြားခဲ့ပါတယ်။ ဒီလိုအခမ်းအနားက ဘာသာပေါင်းစုံ ချစ်ကြည်ရေး ဆောင်ရွက်တဲ့ကိစ္စဖြစ်ပါတယ်”ဟု မန္တလေးတိုင်း သာသနာရေးဦးစီးမှူး ဦးခင်မောင်တင့်က ပြောကြားသည်။

သာသနာတည်ထောင်သူ အရှင်သူမြတ်များနေ့ အခမ်းအနားကို ဘာသာအသီးသီးမှ ခေါင်းဆောင်များအပါအဝင် လူ ၄၀၀ ခန့် တက်ရောက်ခဲ့ပြီး ဘာသာတရားအသီးသီး၏ သွန်သင်ဟောပြောချက် အနှစ်သာရများကို စုစည်းထားသည့် ပြခန်းများလည်း ဖွင့်လှစ်ပြသခဲ့သည်။.

Source : http://thevoicemyanmar.com/news/25359-tdn

Tuesday, August 28, 2018

သာသနာတည်ထောင်သူအရှင်သူမြတ်များနေ့ကျင်းပမည်

မြန်မာနိုင်ငံအဟ်မဒီယာမွတ်စလင်အဖွဲ့ချုပ်မှ လာမည့် ၂၀၁၈ခုနှစ် စက်တင်ဘာလ ၂ရက် တနင်္ဂနွေနေ့တွင် မန္တလေးတိုင်းဒေသကြီး ဆရာဝန်များအသင်းခန်းမ၌ 'သာသနာတည်ထောင်သူအရှင်သူမြတ်များနေ့'ကို ( နံနက် ၉း၀ဝနာရီမှ ၁၂း၀ဝထိ ) ကျင်းပပြုလုပ်မည်ဖြစ်ပါသည်။

အခမ်းအနားဖိတ်စာများကို အောက်ဖော်ပြပါလိပ်စာများတွင် လာရောက်ထုတ်ယူနိုင်ပါကြောင်း လေးစားစွာအသိပေးအပ်ပါသည်။


မန္တလေးမြို့။ အမှတ် (၁၄၃)၊ ၇၆ ×၇၇ ကြား၊ ၂၈ လမ်း၊ ဇီဝဆေးခန်းဘေး၊ ချမ်းအေးသာစံမြို့နယ်၊ မန္တလေးမြို့။ ဖုန်း- ၀၉ ၄၄၃၀၄၇၀၅၄၊ ၀၉ ၂၅၇၁၂၇၈၂၆

ရန်ကုန်မြို့၊ အမှတ်(၁၉၁)၊ ၂၈လမ်း(အထက်)၊ ပန်းပဲတန်းမြို့နယ်၊ ရန်ကုန်မြို့၊ ဖုန်း-၀၁ ၂၅၂၈၉၄ ၀၉ ၂၅၅၇၆၆၃၆၉

Wednesday, August 1, 2018

၂၀၁၈ ခုနှစ် ဗြိတိန်ဂျလ်ဆာညီလာခံကျင်းပရန်စီစဉ်ထားမှုများကို ခလီဖာသခင်ကြည့်ရှုစစ်ဆေး

ကမ္ဘာလုံးဆိုင်ရာ အဟ်မဒီယာအဖွဲဲ႕၏ ဦးစီးခေါင်းဆောင် ပဥ္စမမြောက်ခလီဖာသခင် ဟာဇရတ် မေရ်ဇာ မတ်စ်ရူး အဟ်မဒ်သခင်ဟာ ဗြိတိန်နိုင်ငံမှာ ကျင်းပပြုလုပ်မယ့် အဟ်မဒီယာမွတ်စလင်အဖွဲ့ရဲ့ (၅၂) ကြိမ်မြောက် နှစ်ပတ်လည် ဂျလ်ဆာညီလာခံကို ၂၀၁၈ ခုနှစ် ဇူလိုင်လ (၂၉) ရက်နေ့က ကြည့်ရှုစစ်ဆေးခဲ့ပါတယ်။

စစ်ဆေးမှုတွေပြုလုပ်တဲ့အတောအတွင်း ခလီဖာသခင်ဟာ သုံးရက်တာအခမ်းအနားကို စီစဉ်ကြီးကြပ်မယ့်ဌာနတွေကို သွားရောက်ခဲ့ပါတယ်။ ဌာနအသီးသီးက တာဝန်ရှိသူတွေက ခလီဖာသခင်ကို အစီအစဉ်တွေနဲ့ စပ်လျှဉ်းပြီး ရှင်းလင်းတင်ပြခဲ့ကြပါတယ်။

အဲ့ဒီနောက် ခလီဖာသခင်က လုပ်အားပေး လုပ်ကိုင်သူပေါင်း (၅၀၀၀) ကို သူတို့ရဲ့တာဝန်အသီးသီးကို လုံ့လဝီရိယရှိရှိလုပ်ကိုင်ကြဖို့နဲ့ ဝတ်ပြုတည်ဆောက်မှုတွေမှာ မပျက်မကွက်ရှိကြဖို့ ပြောဆိုခဲ့တယ်။ ခလီဖာသခင်က သူတို့အားလုံးကို တစ်ဦးနဲ့တစ်ဦး ရင်းရင်းနှီးနှီး နွေးနွေးထွေးထွေးရှိကြဖို့ ဂျလ်ဆာညီလာခံကျင်းပမယ့် နေရာဖြစ်တဲ့ အယ်လ်တန်အရပ်နဲ့ ဖဇလ်ဗလီနားအနီးတဝိုက်ကလူတွေဆီက အဟ်မဒီမွတ်စလင်တွေနဲ့ ပတ်သတ်လို့ မကျေနပ်ကန့်ကွက်တိုင်ကြားချက်တွေမရှိစေရအောင် ဂရုစိုက်ကြဖို့ အရေးကြီးကြောင်းပြောဆို အကြံပေးခဲ့တယ်။

ဖဇလ်ဗလီအနီးအနားနေထိုင်သူအချို့က အဟ်မဒီမွတ်စလင်တွေဗလီကိုလာရောက်တဲ့အခါ လမ်းရဲ့တစ်စိတ်တစ်ပိုင်းကို ပိတ်ဆို့ထားတာတွေရှိတယ်ဆိုပြီး မကျေနပ်တိုင်ကြားတာတွေရှိတဲ့အကြောင်း ခလီဖာသခင်က ဖော်ပြပြောဆိုခဲ့တယ်။

တစ်စုံတစ်ယောက်ရဲ့ ပတ်ဝန်းကျင် အိမ်နီးနားချင်းတွေကို အခက်အခဲဒုက္ခဖြစ်စေတာဟာ လုံးဝမှားယွင်းတဲ့ အပြုအမူတွေဖြစ်ပြီး ခုလိုကန့်ကွက်တိုင်ကြားမှုတွေလက်ခံရရှိတာဟာ ခလီဖာသခင်အတွက်ပါ အကြီးအကျယ်အရှက်ရစရာဖြစ်ကြောင်း ပြောဆိုခဲ့ပါတယ်။

နိဂုံးချုပ်အနေနဲ့ခလီဖာသခင်က အလ္လာဟ်အရှင်မြတ်ကို ဝတ်ပြုဖို့နဲ့ ဆွလာသ်ဝတ်ပြုခြင်းရဲ့ အရေးကြီးပုံကို ထပ်မံပြောဆိုခဲ့ပါတယ်။ ခလီဖာသခင်က ...
" ဒီရက်တွေမှာ ကျွန်တော်တို့အားလုံးဟာ ဝတ်ပြုခြင်းအပေါ်မှာ အထူးအာရုံစိုက်အလေးထားဖို့လိုပါမယ်။ အကြောင်းက ကျွန်တော်တို့အားလုံးရဲ့ အောင်မြင်မှုဟာ ဝတ်ပြုတည်ဆောက်ခြင်းအပေါ်မှာ မူတည်နေလို့ပါပဲ။ ကျွန်တော်တို့ရဲ့ လုပ်ငန်းဆောင်တာတွေနဲ့ ရည်မှန်းချက်တွေအားလုံးကို အလ္လာဟ်အရှင်မြတ်ရဲ့ ကောင်းချီးမင်္ဂလာသက်သက်နဲ့သာ ဖြည့်စည်းဆောင်ရွက်နိုင်မှာဖြစ်တယ်။ အလ္လာဟ်အရှင်မြတ် လုပ်အားပေးလုပ်ကိုင်ဆောင်ရွက်ပေးသူတိုင်းကို သူတို့ရဲ့တာဝန်တွေကို အကောင်းဆုံးပုံစံနဲ့ တာဝန်ကျေပွန်အောင် ထမ်းဆောင်နိုင်တဲ့ စွမ်းအားပေးတော်မူပါစေ။"

အစောပိုင်းမှာ ခလီဖာသခင်ဟာ ဗြိတိန်အဟ်မဒီယာ အဖွဲ့ပိုင် ဟက်စလီမီးရ် ဝင်းအတွင်းနဲ့ ဗိုင်တုလ်ဖူတူ (လန်ဒန်) ဗလီမှာပြုလုပ်ထားတဲ့ ဂျလ်ဆာ ညီလာခံ အတွက် စီစဉ်ထားမှုတွေကို ကြည့်ရှုစစ်ဆေးခဲ့ပါတယ်။

ဂျလ်ဆာညီလာခံဟာ သောကြာနေ့ နေ့လည်ခင်းမှာ စတင်မှာဖြစ်ပြီး ဒီအခမ်းအနားမှာပဲ ခလီဖာသခင်ရဲ့ အပတ်စဉ် သောကြာမိန့်ခွန်းကို ဟောကြားမှာဖြစ်ပါတယ်။ အဲ့ဒီနောက် ရက်သတ္တပတ်ရဲ့ပိတ်ရက်နှစ်ရက်စလုံးမှာ နော်ထပ်ဟောပြာမှု (၄) ခုကို ဆက်လက်ဟောကြားမှာဖြစ်ပါတယ်။

တနင်္ဂနွေနေ့မှာတော့ ထောင်ပေါင်းများစွာသော အဟ်မဒီမွတ်စလင်တွေဟာ ခလီဖာသခင်ထံမှာ ဘိုင်အတ်လို့ခေါ်တဲ့ ခလီဖာသခင်ကို နာခံသစ္စာခံယူမှုပြုလုပ်သွားကြမှာဖြစ်ပါတယ်။

ဒီအစီအစဉ်တစ်ခုလုံးကို MTA နိုင်ငံတကာရုပ်သံအစီအစဉ်ကနေတိုက်ရိုက်ထုတ်လွှင့်သွားမှာဖြစ်ပါတယ်။

Friday, June 29, 2018

လိင်တူဆက်ဆံခြင်း ဟာမျိုးဗီဇစေ့ဆော်မှုကြောင့်ဖြစ်တာလား၊ LGBTQ လှုပ်ရှားမှုအပေါ်အမြင်

ဒီရက်ပိုင်း ကမ္ဘာအနှံ့မှာ LGBTQ လှုပ်ရှားမှုတွေနဲ့ပတ်သတ်တဲ့ သတင်းတွေ၊ ထောက်ခံအားပေးတာတွေ ၊ချီတက်ဆန္ဒထုတ်ဖော်တာတွေကို တွေ့ရတယ်။ မြန်မာပြည်မှာလည်း  သံရုံးတွေ၊လူမှုအဖွဲ့အစည်းတွေအတွင်းမှာ ဒီအကြောင်းအရာတွေကို ထောက်ခံအားပေးပျံ့နှံ့အောင်လုပ်ဆောင်တာတွေတွေ့ရတယ်။သူတို့ကို ခွဲခြားဆက်ဆံမှုတွေ၊ နှိမ့်ချချိုးနှိမ်ပြီး ဝိုင်းကြဉ်ထားတာ၊ ပယ်ထားတာတွေကနေ မရှိတော့အောင်လုပ်ဆောင်ပေးတာတွေလည်းပါဝင်ပါတယ်။  LGBTQ လှုပ်ရှားမှုရဲ့ အဓိပ္ပာယ်မှာ မိန်းမလျှာတွေ၊ အခြောက်တွေ၊  လိင်တူလိင်ကွဲဆက်ဆံသူတွေ၊ လိင်ပြောင်းလဲထားသူတွေ လိင်တူဆက်ဆံသူတွေ စသဖြင့် ပုံမှန်မဟုတ်တဲ့ သဘာဝမကျတဲ့ လိင်ဆက်ဆံမှုတွေပါဝင်ပြီး သူတို့ကို လူမှုအဖွဲ့အစည်းထဲမှာ ဒီအတိုင်း နားလည်လက်ခံပေးဖို့ကြိုးစားနေကြတာလည်းဖြစ်တယ်။ ဒါပေမယ့် သူတို့ရဲ့ တကယ့်အရင်းအမြစ်ပြဿနာဖြစ်တဲ့ မူမမှန် သဘာဝလွန် စိတ်ခံစားမှု အခြေအနေတွေကနေ လွတ်မြောက်အောင်လုပ်ဆောင်ပေးနိုင်တဲ့ အရေးကြီးတဲ့ပြုပြင်ပြောင်းလဲမှုတွေမပါဝင်ပါဘူး။


ကျွန်တော်တို့ကတော့ အစဉ်အလာအတိုင်းပဲ လိင်တူဆက်ဆံတာ၊လိင်တူခြင်းလက်ထက်တာတွေကို သဘာဝမကျဘူး လူ့အဖွဲ့အစည်းမှာ လက်မခံသင့်ဘူးလို့မြင်ကြတယ်။ ဆေးပညာတိုးတက်လာလို့ ဘေးအန္တရာယ်တွေအများကြီး ရှောင်လာနိုင်ပေမယ့် လိင်တူဆက်ဆံရာကနေကူးစက်ရောဂါတွေအများကြီးပျံ့နှံ့ဖို့ လွယ်ကူပါသေးတယ်။ ဒီလိုအပြုအမူတွေ ပွင့်ပွင့်လင်းလင်း အဆီးအတားမရှိဖြစ်လာမယ်ဆိုရင် လူ့အဖွဲ့အစည်းကို အများကြီးထိခိုက်စေနိုင်တယ်။ အိမ်ထောင်ပြုတာ၊ လက်ထက်တာဟာ လူ့မျိုးဆက်ပြန့်ပွားဖို့၊ သားသမီး ပွားစီးဖို့ဆိုတဲ့ ရည်ရွယ်ချက်တွေရှိရပါတယ်။ သားသမီးပွားစီးခြင်း ဖို့မဖြစ်နိုင်တဲ့ လိင်တူခြင်းလက်ထက်တာဟာ အိမ်ရာထူထောင်ခြင်းရဲ့ အနှစ်သာရကိုလည်း မေးခွန်းထုတ်စရာဖြစ်လာစေပါတယ်။

LGBTQ လှုပ်ရှားသူတွေ၊လိင်တူဆက်ဆံသူတွေရဲ့ အမြင်မှာ သူတို့ဟာ မွေးရာပါ မျိုးဗီဇ တိမ်းညွတ်မှု (Genetic Tendencies) အရ သူတို့မှာ ဒီလိုစိတ်ခံစားမှုနဲ့ အခြေအနေတွေဖြစ်ရတယ်လို့ဆိုကြတယ်။ ဆိုလိုတာက သူတို့ဒါနဲ့ပတ်သတ်လို့ ဘာမှလုပ်လို့မရဘူး။ သူတို့ကို ဒီအတိုင်းလက်ခံပေးဖို့ တောင်းဆိုကြတယ်။ အာဖရိကန် အမေရိကန် လူမည်းတွေကိုလည်း မျိုးဗီဇအရ အသားမဲတာကြောင့် ကျွန်တွေအဖြစ် ထားခဲ့ကြတယ်။ ယခုတော့ မျိုးဗီဇကြောင့် ခွဲခြားမှုတွေဟာ လူအဖွဲ့အစည်းမှာ မရှိသင့်တော့ဘူး။ သူတို့လည်း အဲ့ဒီအလားတူ တောင်းဆိုမှုပြုကြတာလို့ဆိုကြတယ်။

ဆန်းစစ်ကြည့်တဲ့အခါ တကယ်တော့ လိင်တူဆက်ဆံမှု စေ့ဆော်မှုတွေဟာ မျိုးဗီဇက စေ့ဆော် တိမ်းညွတ်မှုကြောင့်ဖြစ်ရတာမဟုတ်ပါဘူး။ သဘာဝကျတဲ့ လိင်ကွဲ ဆက်ဆံမှုပဲဖြစ်ဖြစ် သဘာဝမကျတဲ့ လိင်တူဆက်ဆံမှုပဲဖြစ်ဖြစ် နောက်ကွယ်က အတင်းအကျပ်စေ့ဆော်မှုရှိတာကြောင့်မဟုတ်ပါဘူး။ အတင်းအကျပ်စေ့ဆော်မှုတွေဟာ လူ့အဖွဲ့အစည်းရဲ့ အပြုအမူတွေကနေမွေးဖွားလာတာသာဖြစ်တယ်။ လူ့အဖွဲ့အစည်းအတွင်းမှာ ဖြစ်ပျက်နေတဲ့ အတင်းအကျပ် စေ့ဆော်မှုတွေကို ကြည့်ရင် လိင်ပိုင်းဆိုင်ရာ စေ့ဆော်မှုတွေတင်မကပါဘူး။ တဏှာ ရာဂတွေကို တက်မက်မောနေတဲ့ စေ့ဆော်မှုတွေရှိနေတယ်။ ဝတ္ထုပစ္စည်းတွေကို ရယူပိုင်ဆိုင်လိုတဲ့ စေ့ဆော်မှုတွေရှိနေတယ်။ တစ်ချို့လူတွေဟာ သူတပါး ပစ္စည်းကို ခိုးယူကြတယ်။ လုယက်ကြတယ်။ လူတွေကို သတ်ဖြတ်ကြတယ်။ ဒါတွေကို ကျွန်တော်တို့ မကြိုက်နှစ်သက်ကြဘူး။ ဒါတွေကကော စေ့ဆော်မှုကြောင့် ဖြစ်တာမဟုတ်ဘူးလား။ ဒီလိုစေ့ဆော်မှုတွေကို ဖိနှိပ် ချိုးနှိမ်မထားသင့်ဘူးလား။ ဒါတွေကျတော့ မျိုးဗီဇ တိမ်းညွတ်မှုကြောင့်ဖြစ်တာလို့ ဘာလို့မပြောတာလဲ?


တကယ်တော့ တစ်ချို့စေ့ဆော်မှု ဆန္ဒတွေဟာ ဖိနှိပ်ချိုးနှိမ်ထားရမှာဖြစ်တယ်။ ဒါမှာသာ လူမှုအဖွဲ့အစည်းဆိုင်ရာ ပြောင်းလဲမှုတွေဖြစ်လာမှာဖြစ်ပြီး ကောင်းမွန်မြင့်မြတ်တဲ့ လူ့အဖွဲ့အစည်းတစ်ခုဖြစ်လာမယ်။ဒီမကောင်းမှုစေ့ဆော်မှုတွေ၊ စိတ်ခံစားမှုတွေကို စည်းကမ်းတကျ ထိန်းချုပ်မှုမရှိဘဲ ဒီအတိုင်းလွှတ်ထားလိုက်မယ်ဆိုရင် လူ့အဖွဲ့အစည်းဟာ မငြိမ်းချမ်းဘဲ ပရမ်းပတာသာဖြစ်နေလိမ့်မယ်။ လူသားရဲ့ ပြင်းပြတဲ့ဆန္ဒတွေဟာ စိတ်ပိုင်းဆိုင်ရာ အပြုအမူတွေမှာ ပျံ့နှံ့နေတယ်။ စိတ်ပညာရှင် ဆစ်ဂမန် ဖရိုက်ဒ် ရဲ့ အလိုအရ ဒီလိုမကောင်းတဲ့စေ့ဆော်မှုတွေကို ဖိနှိပ်ချိုးနှိမ်တာဟာ ဖျက်စီးတာမဟုတ်ဘဲ  စည်းကမ်းနဲ့ ထိန်းသိမ်းကြပ်မတ်ပေးတာသာဖြစ်တယ်။ ဒါမှသာ ဒီနေ့ခေတ်မှာလိုအပ်နေတဲ့ ကောင်းမွန်တဲ့လူ့အဖွဲ့အစည်းဖြစ်လာနိုင်မယ်။

စိတ်မကောင်းစရာကတော့ ဒီ LGBTQ လှုပ်ရှားမှု လုပ်ဆောင်သူတွေဟာ ဒီလိုအကြောင်းအရာတွေကို ဂရုမစိုက်ကြဘူး။ သူတို့ရဲ့လှုပ်ရှားမှုတွေကြောင့် တစ်ကမ္ဘာလုံး လူ့အဖွဲ့စည်းအတွင်းမှာ ယိုယွင်းပျက်စီးမှတွေဘက်ကိုသာ ပိုရောက်ရှိနေကြတယ်။ မှန်ကန်တဲ့ နည်းလမ်းနဲ့ မဖြေရှင်းနိုင်ရင် ဒီအခြေအနေတွေကနေ ကျွန်တော်တို့ဟာ ကိုယ့်ဘာသာကိုယ် ကယ်တင်နိုင်တော့မှာမဟုတ်ဘူး။

တစ်ပတ်အတွင်း လူကြိုက်အများဆုံး

 
-